Gerðar hafa verið breytingar á stjórnendahópi Skeljungs samhliða breytingum á skipuriti félagsins.
Skeljungur hefur ráðið til liðs við sig tvo nýja framkvæmdastjóra yfir sölusviði Skeljungs og markaðssviði sem er nýtt svið. Eftir breytingarnar eru fjögur svið sem heyra undir forstjóra félagsins.

Sigurður Orri Jónsson hefur tekið við starfi framkvæmdastjóra sölusviðs. Sigurður er með meistaragráðu í viðskiptahagfræði frá Háskólanum í Álaborg og BS í viðskiptafræði frá sama skóla.
Undanfarin ár hefur Sigurður starfað hjá Eimskip, en frá 2006 hefur hann gengt stöðu framkvæmdastjóra Eimskips í Danmörku.

Við stöðu framkvæmdastjóra markaðssviðs tekur Ingunn Sveinsdóttir, en hún hefur starfað hjá N1 frá árinu 2006 sem framkvæmdastjóri einstaklingssviðs og sölu- og markaðssviðs. Áður starfaði Ingunn sem útibússtjóri hjá Íslandsbanka. Ingunn er viðskiptafræðingur að mennt og útskrifaðist frá Háskóla Íslands.

Breytingar eru hluti af uppbyggingu Skeljungs og liður í að efla enn frekari vöxt félagsins.

„Við ráðumst í þessar breytingar nú til að ná betur til okkar viðskiptavina og styrkja enn frekar það kraftmikla starf sem unnið er í Skeljungi og stuðla að enn frekari vexti. Við bjóðum þessa öflugu starfsmenn velkomna í hópinn“ segir Valgeir M. Baldursson forstjóri Skeljungs